Iwwert d’Schicksal vun engem bestëmmte soziale Grupp, nämlech deem vun de Kanner, gouf relativ wéineg recherchéiert. An dësem Kontext dränge sech awer eng ganz Rei Froen op: wéi vill huet de Krich den Alldag vun de Kanner gepräägt? Wéi hunn d’Kanner dës Zäit erlieft a veraarbecht? Mat wéi enge Mëttelen hunn d’Nationalsozialiste versicht d’Kanner ze erfaassen a gläichzeschalten? Wéi erfollegräich waren d’Methode vun den Nazien?
D’Zilsetzung vun dësem Virtrag ass et ze ermëttelen, wéi eng Faktoren d’Liewe vun de Kanner wärend der Besatzungszäit beaflosst hunn a wéi eng Auswierkungen dës Period op si hat.
